శ్రీ యోగ నరసింహస్వామి ఆలయం, హోణన్ గిరి

శ్రీ యోగ నరసింహస్వామి ఆలయం, హోణన్ గిరి

దొడ్డమల్లూరు దాటాక 2 కి.మీ.ల తర్వాత ఎడమవైపు కమాను కనబడుతుంది.  దానిలోపలకి వెళ్ళాలి.  రోడ్డు అంత బాగుండదు..మట్టి రోడ్డు..కొంచెం గతుకులు..నిర్మానుష్యంగా వుంటుంది.  ఘాట్ రోడ్డే కాకుండా అరణ్య మార్గంకూడా.    వీటన్నింటితో వెళ్ళేటప్పుడు చాలా దూరం వెళ్ళామనిపించింది.  ఇంతా చేస్తే వెళ్ళింది 5 కి.మీ.లే.  మీరు భయపడాల్సినంత దట్టమైన చెట్లుకానీ, గుంటల రోడ్లుకానీ వుండవండీ.

ఇక్కడ కొండమీద  శ్రీ  యోగ నరసింహస్వామి వున్నారు.  పూర్వం కణ్వ మహర్షి ఇక్కడ తపస్సు చేశారు.  ఆయన తపస్సుకి మెచ్చి నరసింహస్వామి ప్రత్యక్షమైనారు.  పూర్వం ఋషులు భగవంతుడు ప్రత్యక్షమైనా వారికోసం ఏమీ కోరుకునేవారుకాదు.  సమాజ శ్రేయస్సుకోసం ప్రత్యక్షమైన భగవంతుని అక్కడే వుండి ప్రజలను కాపాడమని కోరేవారు.  కణ్వ మహర్షికూడా అలాగే కోరటంతో నరసింహస్వామి అక్కడే వెలిశాడు.  తర్వాత కణ్వమహర్షి అక్కడనుంచి వెళ్ళిపోయారు. 

ఇక్కడ స్వామిదగ్గరవున్న గరుడ స్తంబం గురించి అక్కడి పూజారి ఏదో చెప్పారుకానీ కన్నడ భాషా జ్ఞానం లేనందున అర్ధం చేసుకోలేకపోయాను.  నాకు అర్ధం అయినంతమటుకూ గరుడ స్తంబం ఆలయ గోపురానికన్నా ఎత్తుగా వుంది.  బహుశా స్వామి ఆ స్తంబంలో ప్రత్యక్షమయ్యారేమో.  అందరికీ ఈ ఆలయం గురించి చెప్తానంటే, స్వామి ఫోటో దగ్గరనుంచి పూజారిగారే స్వయంగా తీసిచ్చారు.    ఫోటోలో స్వామి వెనుకవున్న గరుడస్తంబాన్ని గమనించండి.

చాలాకాలం ఆదరణకి నోచుకోని ఈ ఆలయాన్ని 30 ఏళ్ళక్రితం దాసప్ప అండ్ సన్స్, టాడీ కాంట్రాక్టరు, బెంగుళూరు వారు పునర్నిర్మాణంగావించారు.  అప్పటినుంచి భక్తుల రాకపోకలు తిరిగి మొదలయ్యాయి.  శని, ఆదివారాలలో జన సందోహం బాగానే వుంటుంది.  శ్రావణ మాసంలో నాలుగు శనివారాలు ఎక్కువ భక్తులు వస్తారు.  వచ్చిన అందరికీ ఆ రోజుల్లో భోజనాలు పెడతారు.  నరసింహ జయంతికి స్వామి కళ్యాణం జరుగుతుంది.

ఆలయం చిన్నదే.  చుట్టూతా నిర్మానుష్యంగా వుంటుంది.  ప్రశాంత పరిసరాలు.  ఆహ్లాదకరమైన వాతావరణం, సరైన సమయం దొరికితే కొంత సమయం సంతోషంగా గడపవచ్చు.  ఈ పరిసరాల్లో ఏమీ దొరకవు.  వాహనంకూడా మీదయితేనే నయం.  ఆటోలవీ దొరికేట్లు కనబడలేదు.

దర్శన సమయాలు

ఉదయం 9 గం. లనుంచీ 4 గం. ల దాకా.

శని, ఆదివారాలలో ఉదయం 9గం. లనుంచీ 6 గం. ల దాకా.

12-50కి తిరిగి ప్రయాణం మొదలైంది.

శ్రీ వేణుగోపాలస్వామి ఆలయం, చిక్ మళూరు

శ్రీ వేణుగోపాలస్వామి ఆలయం, చిక్ మళూరు

రహదారికి దగ్గరలో వున్న ఆలయం ఇది.  చిక్ మళూరు రోడ్డులోకి తిరిగిన వెంటనే కుడివైపు సందులో కొంచెం లోపలకి వెళ్తే వస్తుంది ఈ అతి పురాతన ఆలయం.  ఈ ఆలయం 3000 సంవత్సరాల క్రితందని పూజారిగారు చెప్పారు.  ఇక్కడ శ్రీ వేణుగోపాలస్వామి రుక్మిణీ సత్యభామా సమేతంగా దర్శనమిస్తాడు. 

రాజ రాజ మార్తాండ మహారాజు, మృకండ మహర్షిచేత ప్రతిష్టింప చేయించాడు ఈ స్వామిని.  ఈ స్వామిని సేవించినవారికి సత్వరం కళ్యాణం జరుగుతుందని, సంతానం లేనివారికి సంతానం కలుగుతుందనీ ప్రతీతి.

పూజారిగారు చెప్పినదాని ప్రకారం…కణ్వానదికి పూర్వం నిర్మల అనే పేరుండేది.  కణ్వ మహర్షి ఇక్కడ అశ్వమేధ యాగం చేస్తే స్వామి ప్రత్యక్షమైనాడు.  అతి పురాతనమైన ఈ ఆలయంలో స్వామి దయాళుడు.  సంతానం కోసం, పెళ్ళికోసం, కోరిన కోర్కెలు నెరవేరటం కోసం ఈ స్వామిని ఆశ్రయించే భక్తులపాలిటి కల్పవృక్షం.

కణ్వ మహర్షి ఇప్పటికీ తెల్లవారుఝామున 2-30 ప్రాంతాల్లో వచ్చి స్వామికి పూజ చేస్తారని ఇక్కడివారి నమ్మకం.

ఆలయం మరీ పెద్దదికాదు. పూజారిగారు  ఆలయం ప్రాంగణంలోనే వుంటారు.  ఆలయం మూసిన తర్వాత ఎవరైనా వెళ్తే ఆయనని సంప్రదించవచ్చు.

 ఆలయం బయట ద్వారం

 లోపల ఆలయం

 రుక్మణీ సత్యభామా సమేత శ్రీకృష్ణుడు

కూడ్లూరు

కూడ్లూరు

నదీ నరసింహస్వామి ఆలయంనుంచి మళ్ళీ మైసూరు రోడ్డులో బయల్దేరాము.  తెలుసుకున్నవి కొన్నీ, అస్సలు తెలియనివి కొన్నీ..మొత్తానికి ఆ ప్రాంతంలో ఏమీ వదిలి పెట్టకుండా చూడాలనే తాపత్రయం ఒకటి.  వీటితో దోవలో ఎక్కడ ఏ ఆలయం బోర్డు కనబడ్డా వెళ్దామనేదాన్ని.  ఇలా అయితే ఈ చిన్న ఆలయాలు తప్పితే ఏమీ చూడం అని శ్రీవారి విసుగులు.  అలా వెళ్ళిన ఆలయం ఈ మంగళేశ్వరస్వామి ఆలయం.  రహదారి మీదనుంచి లోపలికి చాలా దూరమే వెళ్ళాము.

700  -  800 సంవత్సరాల క్రితం ఆలయాలివి.  చాలా చిన్నవి.  కణ్వ మహర్షి ఇక్కడ తపస్సు చేసుకున్నారు.  పంచ లింగాలకు ఐదు చిన్న చిన్న ఆలయాలున్నాయి.  మేము వెళ్ళేసరికి స్వామి ముందు తెర వేసివుంది.  పూజారిగారు పది నిముషాలు కూర్చోమన్నారు.  సమయంలేదని వచ్చేయబోతుంటే తెర తొలిగించారు.  అంత అతి చిన్న ఆలయంలో కూడా స్వామిని దర్శిస్తుంటే  ఒక పవిత్ర ప్రదేశంలో వున్నట్లు భక్తి భావం తొణికిసలాడింది.  పురాతన ఆలయాలలో వున్న మహత్యం ఇదేననిపించింది.

ఉదయం 11-10 కి తిరిగి బయల్దేరాము.

నా తొలి ఇబుక్

నా యాత్ర బ్లాగు సందర్శకులకందరికీ అభివందనములు.  ఈ బ్లాగుకు లభించిన ఆదరణ అపూర్వం.  మీ అపురూప ప్రోత్సాహంతో నేను చేసిన ఇంకొక సాహసం..నా తొలి ఇబుక్  యాత్రా దర్శిని  నల్గొండజిల్లా.  అదికూడా ఏదో మేము చూసినవన్నీకాకుండా ఒక్కొక్క జిల్లాకి ఒక్కొక్క పుస్తకం చెయ్యాలనే సాహసంతో మొదలుపెట్టిన కార్యక్రమం.  సంకల్పమైతే వున్నది.  ఆ దైవ కృప, మీ అందరి ఆదరణ లభిస్తే పూర్తిచెయ్యగలననే విశ్వాసం వున్నది. 

ఈ తొలిమెట్టు ఎక్కటానికి  చేయూతనిచ్చినవారు కినిగె శ్రీ చావా కిరణ్ కుమార్ గారు.  వారికి నా హృదయపూర్వక ధన్యవాదాలు ఈ బ్లాగుద్వారా తెలియజేసుకుంటున్నాను.  నా ఈ ప్రయత్నాన్ని మీరంతా ఆదరిస్తారని ఆశిస్తూ లింకు కింద ఇస్తున్నాను.  ఈ విషయంలో మీ సలహాలు, ప్రోత్సాహం కోరుతున్నాను.

http://kinige.com/kbook.php?id=723 

శ్రీ నదీ నరసింహస్వామి ఆలయం

శ్రీ నదీ నరసింహస్వామి ఆలయం

దొడ్డమల్లూరులోని శ్రీ రామాప్రమేయస్వామి ఆలయంనుంచి ఉదయం 10-05కి బయల్దేరి జాతీయ రహదారిమీదకి రాగానే, రోడ్డుదాటి ఎదురుగావున్నరోడ్డులో వెళ్ళాము.  గుంటలతోకూడిన మట్టి రోడ్డు..చుట్టూ పొలాలు, చెట్లూ .. ప్రకృతి సౌందర్యం చూస్తూ రోడ్డుసంగతి మర్చిపోయాము.  దాదాపు రెండు కిలో మీటర్ల దూరం వెళ్ళాక చేరాము శ్రీ నదీ నరసింహస్వామి ఆలయం.  ఆలయం చిన్నదే. 

దాదాపు 1200 సంవత్సరాల క్రితం నిర్మింపబడిన ఈ ఆలయంలో స్వామిని కణ్వ మహర్షి ప్రతిష్టించాడంటారు.  ఆలయం పక్కనే కణ్వనది ప్రవహిస్తున్నది.      కణ్వ మహర్షి ఈ  నది ఒడ్డున కొంతకాలం తపస్సు చేసుకున్నారుట.  అందుకే ఈ నదికి కణ్వా నది అని పేరు.  ఎగువ కట్టిన ఆనకట్టవల్ల ప్రస్తుతం ఈ నదిలో నీరు లేదు.  వర్షాకాలంలో రిజర్వాయరు నిండిన తర్వాత మాత్రమే ఈ నదిలోకి నీరు వస్తుంది.

ఈ స్వామి అత్యంత మహిమాన్వితుడని భక్తుల నమ్మిక.  ఇక్కడ 48 ప్రదక్షిణలు చేసి కొబ్బరికాయ ముడుపుకట్టిన వారి కోరికలు శీఘ్రమే నెరవేరుతాయని నమ్మకం.

మేము వెళ్ళేసరికి ఆలయం మూసి వున్నది.  పూజారిగారు అప్పుడే అల్పహారంకోసం ఇంటికి వెళ్ళారని, తొందరగానే వచ్చేస్తారని అక్కడ కొబ్బరికాయలు అమ్మే ఆవిడ చెప్పింది.  గోడమీద వున్న పూజారిగారి సెల్ నెంబరుకు దర్శనానికి వచ్చినవారు ఫోన్ చేశారు.  వచ్చేస్తున్నానన్నారని 15 నిముషాలు వేచి చూశాము.  సమయాభావమువల్ల ఇంకా వేచివుండలేక బయల్దేరాము.  దాదాపు మైన్ రోడ్డుకి వచ్చాక ఒక పంతులుగారు బైక్ మీద లోపలకి వెళ్ళటము చూశాము.  బహుశా ఆయనే అయ్యుంటారనుకున్నాంకానీ ఇంకా చూడవలసినవి చాలా వున్నాయిగనుక ముందుకే సాగాము.